Apple նորույթներ 2026

Apple-ը կրկին արեց այն, ինչ ամեն տարի սպասում են միլիոնավոր մարդիկ ամբողջ աշխարհում․ ներկայացրեց իր նորագույն սարքերը և մի քանի ժամով ամբողջ տեխնոլոգիական աշխարհը կենտրոնացավ մեկ բեմի վրա։ Սակայն այս անգամ Apple-ի պրեզենտացիան սովորական սեպտեմբերյան թարմացում չէր։ 2026 թվականի սեպտեմբերի 9-ի «Surprise and Shine» միջոցառման ուշագրավ նորույթը դարձավ Apple-ի առաջին ծալվող սմարթֆոնը՝ iPhone Duo-ն։ Դրան միացան iPhone 18 Pro և iPhone 18 Pro Max-ը, Apple Watch Series 12-ը, Apple Watch Ultra 4-ը և AirPods 5-ը։ Այսպիսով՝ ի՞նչ նոր բան բերեց Apple-ը այս անգամ և ո՞ր սարքն է ամենաշատը փոխելու ընկերության էկոհամակարգը։

iPhone Duo․ առաջին ծալվող iPhone-ը

Տարիներ շարունակ շուկայում շրջանառվում էին խոսակցություններ Apple-ի ծալվող iPhone-ի մասին։ Երեկ այդ սպասումը վերջապես ավարտվեց։ Փակ վիճակում այն աշխատում է որպես կոմպակտ սմարթֆոն՝ 5.4 դյույմանոց արտաքին էկրանով, իսկ բացելուց հետո օգտատերը ստանում է մեծ 7.6 դյույմանոց ներքին էկրան։ Այս ձևաչափը սարքին թույլ է տալիս միաժամանակ լինել և՛ սովորական սմարթֆոն, և՛ փոքր պլանշետ հիշեցնող աշխատանքային գործիք։ Apple-ը հատուկ ուշադրություն է դարձրել բազմաֆունկցիոնալությանը։ Մեծ էկրանը հնարավորություն է տալիս միաժամանակ աշխատել մի քանի հավելվածների հետ, իսկ սարքը աջակցում է նաև Apple Pencil-ին։

Տեխնիկական առումով Duo-ն ստացել է A20 Pro չիպը և մինչև 2 ՏԲ հիշողություն։ Apple-ը խոստանում է նաև ավելի արդյունավետ հովացման համակարգ, ինչը հատկապես կարևոր է մեծ էկրանով և բարձր արտադրողականությամբ սարքի համար։

iPhone Duo-ն ներկայացվել է երկու երանգով՝ աստղային սպիտակ (Star White), և մուգ կապույտ (Night Sky)։ Այս գունային ընտրությունը լավ է համապատասխանում սարքի ավելի մինիմալիստական և պրեմիում դիզայնին։

iPhone Duo-ի գինը

Այստեղ Apple-ը, մեղմ ասած, չի փորձել զարմացնել մատչելիությամբ․ iPhone Duo-ի մեկնարկային գինը $1,999 է, ինչն այն դարձնում է Apple-ի ամենաթանկ iPhone-ը։ Բայց սա պարզապես հերթական iPhone-ը չէ։ Apple-ը մտնում է ծալվող սմարթֆոնների շուկա և փորձում է իր ձևով վերաիմաստավորել այդ կատեգորիան։

iPhone 18 Pro և iPhone 18 Pro Max․ պրոֆեսիոնալ մակարդակը բարձրանում է

Եթե ծալվող iPhone-ը երեկվա ամենամեծ անակնկալն էր, ապա iPhone 18 Pro և 18 Pro Max-ը Apple-ի հիմնական ֆլագմաններն են։ Երկու մոդելն էլ աշխատում են նոր A20 Pro չիպով և ստացել են տեսախցիկների լուրջ թարմացումներ։ Այս տարի Apple-ի ուշադրության կենտրոնում հատկապես լուսանկարչությունն ու տեսանկարահանումն էին։ Նոր Pro մոդելներում հայտնվել է փոփոխական բացվածքով տեսախցիկ, որը թույլ է տալիս ավելի ճկուն վերահսկել լուսավորությունն ու նկարահանման արդյունքը։ Apple-ը նաև ներկայացրել է նոր AI գործիքներ լուսանկարների մշակման համար։

Իսկ iPhone 18 Pro Max-ը առանձնանում է նաև ավելի երկար մարտկոցի աշխատանքով՝ մինչև մոտ 45 ժամ տեսանյութի նվագարկում նշված ցուցանիշով։

iPhone 18 Pro և iPhone 18 Pro Max մոդելները հասանելի են չորս գույնով՝ սև, արծաթագույն, սառցե կապույտ և նոր՝ հարուստ բորդո գույնով (Burgundy՝)։ Հատկապես Burgundy-ն աչքի է ընկնում իր ավելի արտահայտիչ և պրեմիում տեսքով։

Գները սկսվում են՝ iPhone 18 Pro՝ $1,199-ից , iPhone 18 Pro Max-ը՝ $1,299-ից։ Այսինքն՝ Apple-ը Pro շարքը կրկին դիրքավորում է որպես այն մարդկանց ընտրությունը, ովքեր ցանկանում են առավելագույն արտադրողականություն, տեսախցիկի հնարավորություններ և մեծ էկրան։

Apple Watch Series 12․ ժամացույցը դառնում է ավելի խելացի

Apple-ի նորույթների ցանկում իր տեղն ուներ նաև Apple Watch Series 12-ը։ Նոր սերունդը ստացել է նոր՝ S11 չիպ և առողջության վերահսկման թարմացված սենսորներ։ Ժամացույցը կարող է ավելի հաճախ հետևել սրտի աշխատանքին և տրամադրել օգտատիրոջ առողջական վիճակի մասին լրացուցիչ տվյալներ։ Apple-ը նաև ներկայացրել է նոր՝ «Health Age» ֆունկցիան, որը առողջական տարբեր ցուցանիշների հիման վրա փորձում է գնահատել մարդու առողջական «տարիքը»։ Այսպիսով, Apple Watch-ը աստիճանաբար հեռանում է պարզապես «ժամացույց» լինելու գաղափարից և ավելի շատ վերածվում է առողջության ու ֆիթնեսի մշտական ուղեկցի։

Apple Watch Series 12-ը ստացել է գույների ավելի լայն ընտրություն․ ալյումինե տարբերակները հասանելի են մուգ բրոնզագույն (Dark Bronze), սև (Black), բաց ոսկեգույն (Light Gold) և տիեզերական մոխրագույն (Space Gray) երանգներով, իսկ տիտանե տարբերակները՝ փայլուն ոսկեգույն (Radiant Gold) և բնական տիտան (Natural Titanium)։

Apple Watch Ultra 4․ երբ սովորական Apple Watch-ը բավարար չէ

Եթե 12-րդ սերիան նախատեսված է ամենօրյա օգտագործման համար, ապա Apple Watch Ultra 4-ը Apple-ի ավելի դիմացկուն և պրոֆեսիոնալ տարբերակն է։ Այն ստացել է նույն՝ նոր սերնդի տեխնոլոգիական հիմքը, ավելի առաջադեմ առողջական հնարավորություններ և երկարացված մարտկոցի աշխատանք։ Apple-ի տվյալներով՝ այն կարող է ապահովել մինչև 45 ժամ մարզումների ընդլայնված հետևում։ Մեկնարկային գինը՝ $799։ Այս մոդելը հատկապես հետաքրքիր է նրանց համար, ովքեր ակտիվ սպորտով են զբաղվում, շատ են ճանապարհորդում կամ պարզապես ցանկանում են Apple-ի ամենաամուր և երկար աշխատող ժամացույցը։

AirPods 5․ ավելի մատչելի, բայց արդեն աղմուկի չեղարկման գործառույթով

Apple-ը ներկայացրեց AirPods 5-ը, և այստեղ ընկերությունը նույնպես բավական հետաքրքիր քայլ արեց։ Նոր ականջակալների գլխավոր առանձնահատկություններից մեկը աղմուկի չեղարկման գործառույթն է (ANC)։ Apple-ի պաշտոնական էջում նշվում է, որ նոր AirPods 5-ը կարող է ապահովել մինչև 1.5 անգամ ավելի արդյունավետ Active Noise Cancellation, քան նախորդ սերունդը։ Սա հատկապես հետաքրքիր է, քանի որ Apple-ը Noise Cancellation-ը բերել է ավելի մատչելի AirPods կատեգորիա։ Բացի այդ, նոր սերունդը ստացել է նոր ակուստիկ ճարտարապետություն, ավելի լավ ձայն և Apple-ի էկոհամակարգի հետ ավելի խորը ինտեգրում։ AirPods 5-ի մեկնարկային գինը՝ $129։ Այսինքն՝ Apple-ը փորձում է ANC-ն դարձնել ոչ թե միայն Pro մոդելների առավելություն, այլ ավելի լայն լսարանի հասանելի ֆունկցիա։

Իսկ ո՞րն էր երեկվա ամենամեծ ասելիքը

Եթե ամբողջ պրեզենտացիան մեկ նախադասությամբ նկարագրենք, ապա պատկերը բավական պարզ է։ Apple-ը երեկ պարզապես նոր սարքեր չթողարկեց․ ընկերությունը ցույց տվեց, թե ինչպիսին է պատկերացնում իր հաջորդ տեխնոլոգիական փուլը։ 

• iPhone 18 Pro-ն զարգացնում է արդեն հայտնի ֆլագմանի գաղափարը։
• Apple Watch Series 12-ը և Ultra 4-ը խորասուզվում են առողջության ու ֆիթնեսի ոլորտ։
• AirPods 5-ը բարձրացնում է սովորական ականջակալների հնարավորությունների նշաձողը։
• Իսկ iPhone Duo-ն ամբողջությամբ նոր կատեգորիա է բացում Apple-ի համար։

Apple նորույթները Հայաստանում

Apple-ի նոր ներկայացված սարքերը սկզբնական շրջանում հասանելի կլինեն միջազգային շուկաներում, իսկ Հայաստան դրանց պաշտոնական և տեղական վաճառքի մեկնարկի ժամկետները կարող են տարբեր լինել։ Նոր մոդելների հասանելիությունը կախված կլինի նաև ներմուծման և մատակարարման ժամկետներից։ Հայաստանում նորույթների հայտնվելուն պես դրանց գներին ու հասանելիությանը կարող եք հետևել AllSell-ում։