Google Pixel 11 շարք. ի՞նչ նորություն է բերել Google-ի նոր սերունդը

Google-ը ներկայացրեց իր հայտնի Pixel սմարթֆոնների նոր սերունդը։ Ինչպես նախորդ անգամ, ընկերությունը ցուցադրեց չորս նոր մոդել՝ հիմնական Pixel 11-ը, բարելավված Pixel 11 Pro-ն, Pixel 11 Pro XL-ը և ծալվող Pixel 11 Pro Fold սմարթֆոնը: Այս հոդվածում կանդրադառնանք դրանցից յուրաքանչյուրին, կներկայացնենք նորույթ շարքի առանձնահատկությունները և կհամեմատենք դրանք նախորդ սերնդի հետ:

Google Pixel 11

Նոր Pixel 11-ը պարզապես հերթական թարմացումը չէ․ Google-ը մի շարք կարևոր փոփոխություններ է կատարել՝ սկսած պրոցեսորից մինչև տեսախցիկ և լիցքավորման համակարգ։ Ամենամեծ նորություններից մեկը, իհարկե, Tensor G6 չիպն է, որը փոխարինել է նախորդ սերնդի Tensor G5-ին։ Չնայած նոր պրոցեսորի մասին մանրամասները դեռ սահմանափակ են, արդեն հայտնի է, որ այն արտադրվում է առաջադեմ 2 նմ տեխնոլոգիայով և նախատեսված է ավելի արագ ու արդյունավետ Gemini AI գործառույթների համար։ Օպերատիվ հիշողությունը մնացել է նույնը՝ 12 ԳԲ, սակայն Google-ը էականորեն վերափոխել է ներքին հիշողության տարբերակները։ 128 ԳԲ տարբերակ այլևս չկա և փոխարինվել է 512 ԳԲ-ով։ Դրա շնորհիվ Pixel 11-ը հրաժարվում է նախկինում օգտագործվող UFS 3.1 հիշողությունից և անցնում ավելի արագ UFS 4.0 ստանդարտին։

Տեսախցիկ՝ փոքր փոփոխություն, մեծ ազդեցություն

Եթե ձեզ համար կարևոր է լավ նկարող սմարթֆոն ունենալը, ապա  արժե դիտարկել Pixel 11-ի տեսախցիկների համակարգը։ Հիմնական տեսախցիկը ստացել է ավելի մեծ սենսոր՝ նախկին 1/1.95" Samsung GN8-ի փոխարեն այժմ օգտագործվում է 1/1.56" սենսոր։ Ավելի մեծ սենսորը կարող է առավելություն տալ հատկապես ցածր լուսավորության պայմաններում՝ թույլ տալով ավելի շատ լույս ստանալ և ստանալ ավելի մանրամասն կադրեր։ 10.8 ՄՊ 3J1 հեռաօբյեկտիվը՝ 5x օպտիկական խոշորացմամբ, պահպանվել է, սակայն թվային խոշորացումը հասել է 30x-ի։ Միևնույն ժամանակ, 13 ՄՊ IMX712 գերլայնանկյուն տեսախցիկը և ավտոֆոկուսով 3J1 առջևի տեսախցիկը մնացել են նույնը։

Ավելի մեծ մարտկոց, կրկնակի արագ անլար լիցքավորում

Մարտկոցի աճը շատ փոքր է՝ ընդամենը 15 մԱժ, և այժմ այն ունի 4985 մԱժ տարողություն։ Սակայն ավելի հետաքրքիր փոփոխությունը լիցքավորման համակարգում է։ Պահպանվել է 30 Վտ լարային լիցքավորում , իսկ անլար լիցքավորումը զգալիորեն արագացել է՝ 15 Վտ-ից հասնելով 25 Վտ-ի։ Այսինքն՝ Pixel 11-ն արդեն շատ ավելի քիչ է զիջում լարային լիցքավորմանը։

Այլ փոփոխություններ

Pixel 11-ը համալրված է 6.3 դյույմանոց OLED էկրանով՝ Full HD+ լուծաչափով, ունի IP68 պաշտպանություն ջրից և փոշուց, ստերեո բարձրախոսներ, Wi-Fi 6E, արագ USB 3.2, eSIM և, իհարկե, աշխատում է Android 17 օպերացիոն համակարգով։

Ընդհանուր առմամբ, Pixel 11-ի փոփոխությունները գուցե առաջին հայացքից հեղափոխական չթվան, սակայն դրանցից մի քանիսը բավական կարևոր են։ Tensor G6-ը, ավելի մեծ հիմնական սենսորը, UFS 4.0 հիշողությունը և 25 Վտ անլար լիցքավորումը նոր Pixel սմարթֆոնը դարձնում են ավելի ժամանակակից և տեխնիկապես հետաքրքիր սարք։

Ստանդարտ Pixel 11-ը հասանելի է չորս երանգով՝ փայլուն եզրերով (բացառությամբ սև տարբերակի)՝ նուրբ բաց կապույտ (Frost),  պայծառ և հարուստ վարդագույն (Hibiscus), պիստակի՝ փափուկ պաստելային բաց կանաչ (Pistachio) երանգ, դասական խորը սև (Obsidian)՝ անփայլ եզրերով։

Pixel 11 Pro և Pro XL

Եթե Pixel 11-ի դեպքում Google-ը հիմնականում բարելավումներ է առաջարկել, ապա Pixel 11 Pro-ի և 11 Pro XL-ի պատմությունը մի փոքր ավելի հակասական է։ Նոր սերնդում կան հետաքրքիր թարմացումներ, սակայն որոշ կետերում նույնիսկ հետքայլ ենք տեսնում։

Առաջին տարօրինակ փոփոխությունը վերաբերում է օպերատիվ հիշողությանը։ 16 ԳԲ RAM-ը բոլոր սկզբնական՝ 256 ԳԲ տարբերակներում փոխարինվել է 12 ԳԲ օպերատիվ հիշողությամբ։ Սա առաջին նման դեպքն է 2023 թվականից ի վեր և, բնականաբար, կարող է որոշ հարցեր առաջացնել հատկապես Pro շարքի գնորդների մոտ։

Ավելի հետաքրքիր է մարտկոցի թեման։ Փոխանակ տարողությունը մեծացնելու՝ Google-ը նույնիսկ փոքրացրել է այն․ Pixel 11 Pro-ն ստացել է 4850 մԱժ, մինչդեռ նախորդ՝ Google Pixel 10 Pro մոդելն ուներ 4870 մԱժ։ 11 Pro XL-ի դեպքում նույնպես նկատվում է նվազում՝ 5200 մԱժ-ի փոխարեն այժմ՝ 5115 մԱժ։ Սա բավական անսպասելի որոշում է:

Այնուամենայնիվ, կա նաև դրական նորություն․ 25 Վտ անլար լիցքավորումն այժմ հասանելի է նաև սկզբնական Pro մոդելում, մինչդեռ նախկինում այդ հնարավորությունը միայն Pro XL-ում էր։ Լարային լիցքավորումը, սակայն, առանձնապես տպավորիչ չէ՝ համապատասխանաբար 30 Վտ և 45 Վտ։

Տեսախցիկների մասով՝ հիմնական շեշտը հեռաօբյեկտիվի վրա

Տեսախցիկների հիմնական համակարգը մեծ փոփոխությունների չի ենթարկվել։ Samsung GNV հիմնական սենսորը և Sony IMX858 գերլայնանկյուն տեսախցիկը մնացել են նույնը։ Փոխարենը թարմացվել է 5x օպտիկական խոշորացմամբ հեռաօբյեկտիվը։ Նախկինում օգտագործվող փոքր 1/2.55" IMX858 սենսորի փոխարեն այժմ տեղադրվել է ավելի մեծ Samsung GN8 սենսոր, ինչը կարող է դրական ազդեցություն ունենալ հատկապես խոշորացման ժամանակ ստացվող լուսանկարների որակի վրա։ Տեսախցիկների համակարգը լրացվում է լազերային ավտոֆոկուսի սենսորով, սակայն այստեղ էլ կա մի ուշագրավ փոփոխություն․ ներկառուցված ջերմաչափն այլևս չկա։ Դրա տեղում հայտնվել է HiLight RGB LED ցուցիչը։ Առջևի տեսախցիկը պահպանել է նախորդ սերնդի 42 ՄՊ լուծաչափը և ավտոֆոկուսը։

Էկրանն ու կապի հնարավորությունները՝ գրեթե առանց փոփոխությունների

Մնացած հիմնական բնութագրերը ծանոթ են։ Pixel 11 Pro-ն և Pro XL-ը ստացել են համապատասխանաբար 6.3 և 6.8 դյույմանոց OLED էկրաններ՝ 1.5K լուծաչափով և LTPO տեխնոլոգիայի աջակցությամբ։ Էկրանները պաշտպանված են Gorilla Glass Victus 2-ով։

Սմարթֆոնները համալրված են Tensor G6 պրոցեսորով, աջակցում են eSIM, Wi-Fi 7, Bluetooth 6.0 և USB 3.2, իսկ ձայնային համակարգը շարունակում է ներկայացված լինել ստերեո բարձրախոսներով։

Ավագ սերնդի Pixel ֆլագմանների համար պատրաստվել է պրեմիում գունապնակ: Պատյանները ունեն փայլատ ծածկույթ՝ մատնահետքերը նվազեցնելու համար. ավազոտ-կարմրավուն երանգ (Canyon), ձիթապտղի կանաչ (Olive), բաց մոխրագույն-արծաթագույն մշուշոտ երանգ (Fog), հարթ, փայլատ սև (Obsidian):

Pixel 11 Pro Fold

Ծալվող Pixel 11 Pro Fold-ը նախորդ սերնդի համեմատ ավելի համեստ թարմացում է ստացել։ Google-ը այստեղ կենտրոնացել է մի քանի առանցքային փոփոխությունների վրա: Ամենակարևոր նորություններից մեկը, բնականաբար, նոր չիպսեթն է։ Բացի դրանից, փոխվել է հիմնական տեսախցիկը, որն այժմ օգտագործում է ավելի մեծ՝ 1/1.56" սենսոր։ Ինչպես Pro շարքի մյուս մոդելներում, այստեղ ևս ջերմաչափը հեռացվել է և դրա փոխարեն տեղադրվել է նույն LED ցուցիչը։ Փոփոխության է ենթարկվել նաև արտաքին էկրանը․ այժմ այն 6.5 դյույմանոց է և աջակցում է LTPO տեխնոլոգիային։ Իսկ ամենահետաքրքիր նորություններից մեկը սարքի քաշն է․ Google-ին հաջողվել է 19 գրամով թեթևացնել սմարթֆոնը, ինչը ծալվող սարքի դեպքում բավական նկատելի տարբերություն կարող է լինել։

Մարտկոցը փոքրացել է, իսկ անլար լիցքավորումն՝ արագացել

Մարտկոցի հարցում իրավիճակը միանշանակ չէ։ Տարողությունը նվազել է՝ 5015 մԱժ-ից հասնելով 4806 մԱժ-ի։ Փոխարենը անլար լիցքավորումը զգալիորեն արագացել է՝ 15 Վտ-ից հասնելով 25 Վտ-ի։ Սակայն այստեղ էլ կա անսպասելի քայլ․ լարային լիցքավորման արագությունը 45 Վտ-ից նվազել է մինչև 30 Վտ։ Այսինքն՝ նոր սերունդը միաժամանակ առաջարկում է ավելի արագ անլար, բայց ավելի դանդաղ լարային լիցքավորում։

Տեսախցիկները՝ հիմնականում ծանոթ համակարգ

Մնացած տեսախցիկների համակարգը մեծ փոփոխությունների չի ենթարկվել։ Սմարթֆոնը շարունակում է ունենալ 10 ՄՊ + 10 ՄՊ երկու առջևի տեսախցիկ, իսկ հետևի մասում պահպանվել են 10.5 ՄՊ գերլայնանկյուն և 10.8 ՄՊ հեռաօբյեկտիվ սենսորները։ Այսպիսով, հիմնական շեշտը դրվել է հենց գլխավոր տեսախցիկի արդիականացման վրա, մինչդեռ մյուս մոդուլները մնացել են նախորդ սերնդի մակարդակում։

16 ԳԲ RAM՝ բոլոր տարբերակներում

Հետաքրքիր է նաև, որ ի տարբերություն Pixel 11 Pro և Pro XL մոդելների՝ Pro Fold-ի RAM-ը չի կրճատվել։ Բոլոր տարբերակները գալիս են 16 ԳԲ օպերատիվ հիշողությամբ, ինչը հատկապես կարևոր է նման թանկարժեք և բազմաֆունկցիոնալ ծալվող սմարթֆոնի համար։

Մնացած հիմնական բնութագրերը նույնպես պահպանվել են՝ 8 դյույմանոց ներքին էկրան, IP68 պաշտպանություն և ծալվող ֆորմատին բնորոշ մեծ աշխատանքային տարածք։

Ընդհանուր առմամբ, Pixel 11 Pro Fold-ը ավելի շատ նուրբ կատարելագործում է, քան ամբողջական վերափոխում։ Այն դարձել է ավելի թեթև, ստացել է LTPO արտաքին էկրան և արագացված անլար լիցքավորում, սակայն փոքրացած մարտկոցն ու դանդաղած լարային լիցքավորումը որոշակիորեն ստվերում են այդ բարելավումները։

Նոր սերնդի նորարարական ծալվող մոդելի գունապնակը սահմանափակվում է երկու գույնով՝ սև (Obsidian), ձիթապտղի երանգ (Olive)

Էլ ի՞նչ նորություններ կան

Pixel 11 շարքը ստացել է նաև մի շարք հետաքրքիր ծրագրային նոր հնարավորություններ, որոնք առաջին հայացքից գուցե մեծ փոփոխություն չթվան, բայց առօրյա օգտագործման ընթացքում կարող են բավական օգտակար լինել։ Օրինակ՝ տեսանյութերի նվագարկիչն այժմ կարող է տեսանյութից առանձնացնել առանձին կադրեր և դրանք վերածել լիարժեք լուսանկարների։ Ամենայն հավանականությամբ, այստեղ արհեստական բանականության մատը խառն է․ համակարգը պարզապես կադր վերցնելու փոխարեն փորձում է այն մշակել և ստանալ ավելի որակյալ վերջնական պատկեր։

Տեսախցիկի հավելվածն էլ ստացել է հեռահուշարար (teleprompter)։ Այս գործիքը հատկապես օգտակար կլինի նրանց համար, ովքեր հաճախ տեսանյութեր են նկարահանում՝ օրինակ՝ սոցիալական ցանցերի համար․ տեքստը կարելի է պահել էկրանի վրա և միաժամանակ նայել տեսախցիկին՝ առանց նախապես ամեն ինչ անգիր անելու։

Իսկ ներկառուցված Google Photos-ում հայտնվել է ևս մեկ հետաքրքիր հնարավորություն․ լուսանկարներն այժմ կարելի է արագ «գեղեցկացնել»՝ պարզապես հրահանգ տալով։ Այսինքն՝ օգտատերը կարող է նկարն ուղղելու համար ավելի քիչ ժամանակ ծախսել՝ մի շարք փոփոխություններ վստահելով արհեստական բանականությանը։

Այսպիսով, Pixel 11 շարքի նորությունները միայն տեխնիկական բնութագրերով չեն սահմանափակվում․ Google-ը փորձել է սարքերը դարձնել նաև ավելի խելացի և հարմար հենց առօրյա օգտագործման ժամանակ։

Ե՞րբ և որտեղ կարելի է գնել Pixel 11-ը Հայաստանում

Google-ը Pixel 11 շարքը պաշտոնապես ներկայացրել է օգոստոսի 12-ին, իսկ վաճառքի մեկնարկը նախատեսված է օգոստոսի 20-ին։ Ինչպես բոլոր նորագույն սմարթֆոնները , այնպես էլ Pixel շարքի նորույթները առաջինը փնտրեք մոտակա AllSell վաճառասրահներում։